Heilsustofnun er lokuð fyrir almenning vegna kórónuveirufaraldursins.   Nánari upplýsingar
 

Streitumeðferð

Meðferðin hentar einstaklingum sem eru að glíma við það mikla streitu að það er farið að hafa hamlandi áhrif á andlega líðan, líf og störf einstaklinga. Streita er eitt hættulegasta mein nútímaþjóðfélags þar sem margir eru með alltof mörg verkefni og skyldur á sinni könnu, s.s. vinnu, fjölskyldu, vini, félagsstarf, heilsu og fjárhag. Því miður verður streitan stundum svo mikil að fólk upplifir að það er að gefast upp eða örmagnast og getur illa sinnt skyldum sínum. Þessi meðferð er fyrir þessa einstaklinga og aðra er telja að streitan sé farin að hafa hamlandi áhrif á líf þeirra.

Hvert er markmið meðferðarinnar?

Markmiðið er að einstaklingar þekki eigin streituvalda og streitueinkenni og tileinki sér aðferðir til að takast á við streitu daglegu lífi.

Þjálfun

Hreyfing er mikilvægur þáttur í því að ná tökum á streitu og er þjálfun einstaklingsmiðuð. Læknir og sjúkraþjálfari setja upp áætlun fyrir hreyfingu og líkamlega þjálfun á meðan á dvöl stendur. Núvitund spilar einnig mikilvægt hlutverk í meðferð við langvinnri streitu og eru gestir hvattir til að taka þátt í daglegri núvitundarþjálfun.

Fræðsla

Á Heilsustofnun er í boði margþætt fræðsla fyrir gesti. Til meðferðar við streitu, þunglyndi, kvíða og svefntruflunum er boðið upp á fyrirlestra og hópmeðferð í framhaldi til úrlausnar verkefnanna. Þeir sem koma til streitumeðferðar eru auk þess hvattir til að mæta á aðra fyrirlestra sem í boði eru.  

Önnur meðferð

Möguleiki er á einstaklingsviðtölum hjá sálfræðingi eða geðhjúkrunarfræðingi. Rík áhersla er lögð á að gestir byggi sig upp bæði andlega og líkamlega auk þess sem áhersla er lögð á hvíld á milli meðferða. Líkamsþjálfunin byggist á getu hvers og eins. Einnig er möguleiki á viðtölum hjá næringarráðgjafa eftir því sem ástæða þykir til, því oft ýtir steita undir óreglu í mataræði. Aðrar meðferðir eins og stuðningur til reykleysis, slökun, sjúkranudd, nálastungur og baðmeðferð eru einnig í boði.

Hver er lengd meðferðar?

Lengd meðferðar er að öllu jöfnu fjórar vikur.

Hverjir koma að meðferð?

Á Heilsustofnun er starfandi þverfaglegt teymi sem í er læknir, sálfræðingar, hjúkrunarfræðingar, sjúkraþjálfari, sjúkranuddari og íþróttakennari sem vinna í einstaklingsmiðaðri samvinnu við gesti.

Læknisfræðilegar meðferðir

Við fáum reglulega reynslusögur frá gestum okkar og hér getur þú séð hvað þeir segja um dvöl sína á Heilsustofnun.

Skoða ummæli