Heilsustofnun er lokuð fyrir almenning vegna kórónuveirufaraldursins.   Nánari upplýsingar
 

Geðendurhæfing

Meðferð í geðendurhæfingu hentar einstaklingum með þunglyndi eða kvíða, einnig einstaklingum sem glíma við lífskreppur eftir áföll svo sem skilnað, sjúkdóma, atvinnumissi, ástvinamissi, fjölskylduátök eða fjölskylduvandamál. Meðferðin gæti einnig hentað þeim sem þurfa aðstoð sem brú milli sjúkrahúsdvalar og heimferðar.

 

Geðendurhæfing á Heilsustofnun leggur mikla áherslu á heilbrigðan lífsstíl, með hollu og góðu fæði. Áhersla er lögð á líkamlega þjálfun og hreyfingu sem sniðin er að getu og þörfum hvers og eins. Auk líkamlegrar þjálfunar er hlúð að andlegri líðan með fræðslu, hópmeðferð og einstaklingsviðtölum.

Hvert er markmið meðferðarinnar?

Markmiðið er að einstaklingar verði færari um að takast á við daglegt líf bæði í atvinnulegu og félagslegu tilliti.

Hópmeðferð

Á Heilsustofnun hefur metnaður verið lagður í hina svokölluðu þriðju bylgju í meðferðarvinnu, þ.e. áhersla á að skilja hvernig hugur okkar starfar og hvernig við getum haft áhrif á hugsun og tilfinningar. Áhersla hefur verið lögð á núvitund sem stendur öllum dvalargestum opin og einnig námskeið fyrir litla hópa, þar sem farið er dýpra og reynt að skilja betur hvernig við erum saman sett og hvernig við bregðumst við. Sjá nánar um samkenndarmiðaða meðferð

Fræðsla

Á Heilsustofnun er margþætt fræðsla í boði fyrir gesti. Í hverri viku eru fyrirlestrar um efni eins og þunglyndi, kvíða, svefntruflanir og streitu. Einstaklingar eru auk þess hvattir til að mæta á aðra fyrirlestra sem geta nýst þeim, 

Viðtöl 

Möguleiki er á stökum einstaklingsviðtölum hjá sálfræðingi eða hjúkrunarfræðingi þar sem unnið er út frá hugrænni atferlismeðferð, samkenndarmiðaðri meðferð (Compassion Focused Therapy) og öðrum meðferðarleiðum. 

Hver er lengd meðferðar?

Lengd meðferðar er að öllu jöfnu fjórar vikur. 

Hverjir koma að meðferð?

Á Heilsustofnun er starfandi þverfaglegt geðteymi sem í eru læknir, sálfræðingar, hjúkrunarfræðingar, sjúkraþjálfari, sjúkranuddari og íþróttakennari sem vinna í góðri samvinnu við dvalargesti.​

 

Við fáum reglulega reynslusögur frá gestum okkar og hér getur þú séð hvað þeir segja um dvöl sína á Heilsustofnun.

Skoða ummæli