Geðendurhæfing

Meðferð í geðendurhæfingu hentar einstaklingum með þunglyndi eða kvíða, einnig einstaklingum sem glíma við lífskreppur eftir áföll svo sem skilnað, sjúkdóma, atvinnumissi, ástvinamissi, gjaldþrot eða fjölskylduvandamál. Meðferðin gæti einnig hentað þeim sem þurfa aðstoð sem brú milli spítaladvalar og heimferðar.

Geðendurhæfing á Heilsustofnun leggur mikla áherslu á heilbrigðan lífsstíl, með hollu og góðu fæði. Einnig er llögð mikil áhersla á líkamlega þjálfun og hreyfingu sem sniðin er að getu og þörfum hvers og eins. Auk líkamlegrar þjálfunar er hlúð að andlegri líðan með fræðslu, hópmeðferð og einstaklingsviðtölum.

Hvert er markmið meðferðarinnar?
Markmiðið er að einstaklingar verði færari um að takast á við daglegt líf bæði í atvinnulegu og félagslegu tilliti.

Viðtöl
Möguleiki er á einstaklingsviðtölum hjá geðlækni, sálfræðingi eða hjúkrunarfræðingi þar sem unnið er fyrst og fremst út frá hugrænni atferlismeðferð. Rík áhersla er lögð á að gestir byggi sig upp bæði andlega og líkamlega. Einnig er möguleiki á viðtölum hjá næringarráðgjafa eftir því sem ástæða þykir til. Aðrar meðferðir eins og stuðningur til reykleysis, slökun, sjúkranudd, nálastungur og baðmeðferð eru einnig í boði.

Hópmeðferð
Á Heilsustofnun hefur metnaður lagður í hina svokölluðu þriðju bylgju í meðferðarvinnu, þ.e. áhersla á að skilja hvernig hugur okkar starfar og hvernig við getum haft áhrif á hugsun og tilfinningar. Á hverju ári bjóðum við upp á  námskeið þar sem við kennum fornar hugleiðsluaðferðir samtvinnaðar við nútíma sálfræði.  Sjá nánar hér.

Fræðsla
Á Heilsustofnun er margþætt fræðsla í boði fyrir gesti. Í hverri viku eru fyrirlestrar um efni eins og þunglyndi, kvíði, svefntruflanir og streitu. Einstaklingar eru auk þess hvattir til að mæta á aðra fyrirlestra sjá nánar hér. 

Hver er lengd meðferðar?
Lengd meðferðar er að öllu jöfnu fjórar vikur. Möguleiki er á endurkomu í tvær vikur.

Hverjir koma að meðferð?
Á Heilsustofnun er starfandi þverfaglegt geðteymi sem í er læknir, sálfræðingar, hjúkrunarfræðingar, sjúkraþjálfari, sjúkranuddari og íþróttakennari sem vinna í góðri samvinnu við gesti.